Vakantie bespreken
Bij oes in de buurt hew neie straoten kregen! En neie riolering, inclusief neie putten in de straot, neie stoepranden, neie parkeerplaotsen, nei greszaod in de barms en prachtige neie lanteernpaolties die oeze dam de hiele nacht in een soort wit maonlicht hult. As Geert ’s mörgens in’t duuster de kraant oet de bus haalt, stiet e wal ‘n kwarteer bij de brievenbus de koppen al te lezen. En ik heb ok neie gerdienen besteld, umdat’t in oeze slaopkamer ok de hiele nacht volle maon is. En dat kan mij niet veul schelen, maar Geert kreg de hormonen er wat van in de war en daordeur krieg ik mien slaop niet.
Die straot lig er bij oes zeer gedegen in. Op sommige plekken is e wal veer maol opnei legd. Nao de eerste maol mus de waterleiding er nog weer deur, tot twie maol an toe. Toen mussen er nog neie putten in, hup de straot er nog maar ies weer oet. Maar oeteindelijk is ’t dan klaor. Gelukkig maar, want mien Geert haar’t er hielemaol met had. Wij gaot in september vaak met vakantie (wij kunt’t jao mooi wachten in’t naoseizoen) maar dat was er dit jaor niet van kommen. En zodoende zat Geert vandeweek op de kop in de reisfolders. Haar e vrijdag metnumen doe e op fiets hen de markt west was. “Kiek”, ruup e gister. “Vieftien-daagse busreis hen Noorwegen! Daor heb ik non altied al geern ies hen wilt. Mooi veur de schoelvakanties an, van 30 juni t/m 14 juli. Laow het er maar ies van nimmen. Dit jaor biw jao hielmaol niet weg west. En het möt daor zo gruwelijk mooi wezen! Veural in die tied van’t jaor.”
Het was gien goedkope reis, maar aj de foto’s zagen in de gids, ja, dan mus ik Geert geliek geven. Wát een mooi land. Wij hebt alles ies op een rij zet, wij hadden gien verjaordagen of zulkswat rond die dagen en doe hew de knup deurhakt. Wij gungen aander jaor op vakantie hen Noorwegen. Mörgen vot maar boeken.En toen hew de hiele aovond op de computer foto’s van Noorwegen bekeken. Oh oh, wij kregen er aal meer zin an. Wij slupen er die nacht onrustig van, en dat lag niet an’t locht van de straotlanteern. As de reis non nog maar niet volboekt was…..
Maar doe Geert de volgende mörgen al vrog de kraant oes de bus haalde, (ik lag nog op bedde) stun e nog gien minuut later in de slaopkamer met een wit papiertien in de haand. En hie keek niet bliede. “Hier!”ruup e, en hie sluug op’t papier.” Een oproep um nao te denken over de straotversiering, aander jaor veur’t Zudenveld. Weet ij wal wanneer of dat is? 8- en 9 juli. Valt verd….midden in oeze vakantie. Nou, zie kunt um mij de pot op met heur Zudenveld. Wij gaot met vakantie, of’t nou Zudenveld is of niet.” En hie sluug de slaopkamerdeur met een klap weer dicht. Want hie wus wal dat ik’t daor niet met iens was. Ik haar der gisteraovond zo gauw niet an dacht. En hie ok niet vanzölf. Maar ach, ik ken hum al zo lang. Ik bin rustig liggen bleven. Zulks möt bij Geert altied even indalen. Doe ik een half uurtien later de kamer in kwam, zat e achter de computer, de kop rood van inspanning. “Half september is ok een mooie tied. Dan giet er ok zun reis hen Noorwegen!”, ruup e.” Is nog honderd euro de man goedkoper ok nog”. “Vot boeken”, zee ik. “Kuw oes er nóg langer op verheugen!”
Groeten, Henderkien