Neie stoepranden
Ach, zo tussen de buigies deur is ’t wal lekker weer. Non regent het even en heb ik mooi even tied um te schrieven. Geert is lopend hen de winkel, en ’t holdt vaak wal’n dik uur an veurdat e der weer is. Vanwege de proterij underweg. Hie giet aans altied wal op fiets hen, maar zien fiets stiet bij de maker. Hie hef een boggel in ’t rad. Dat is kommen deurdat e vanweek in ’t duuster nog evenbij Tina an de Broekveldstraot mus wezen en met een flinke gang bij heur de dam opknapte. Gelukkig hef Geert een zadel met vering in de zadelpen, aans haar e zölf misschien ok wal een deuk had op’n plek waor kerels liever gien deuk hebt. Inderdaod. De Broekveldstraot hef neie stoepranden. En echte drempels op de krusing met de Heirweg! En geweldige grote buizen under de grond um al dat hemelwater of te voeren, veuroetlopend op de gevolgen van de opwarming van de aarde. Slien past zuch an an de toestand in de wereld! Is ’t niet geweldig?
Daor bint trouwens plekken op dizze wereld waor’t al meer as twie jaor niet regend hef. Mensen gaot er dood van honger en ellende. Er bint doezenden mensen op de vlucht veur de oorlog in ’t Midden-Oosten. Vaak jonge mensen met kleine kinderties die alles achterlaoten muzzen, oet angst veur de idiote gruweldaoden van I.S.-fanaten. Waor moet die vluchtelingen hen? Wat veur toekomst hebt die mensen en heur kinder?
Er is op veul plekken in de wereld bittere armoe. In Rio bint de Olympische speulen, maar in die zölfde stad leeft een paar miljoen mensen under droevige umstandigheden. Zo wolden wij de hond er nog niet bijliggen hebben. In de V.S. löp zun Donald Trump een hiele bult körtzichtige Amerikanen de kop gek te maken, in de hoop dat e nog ies president van dat land kan worden. Engeland wil zuch, met dank an net zulkse redenaars, lösmaken van de E.U., Noord-Korea wet van gekkigheid niet wat e doen möt um er maar veur te zörgen dat de rest van de wereld een hekel an heur hef, terwiel de mensen er crepeert. Rusland holdt zunder blikken of blozen de Krim under de doem, röp moord en braand as de Turken een straaljager van heur neerschiet, maar rept met gien woord over het neerhalen van de M.H.17. En aj hen Afrika wilt moej eerst ies oetzuken in welk land of ’t gien oorlog is. En hier in Slien?
Hier maakt wij oes drok over stoeprandties die wat te steil bint. En dat vrouw W. er al over vallen is! (Maar dat die aans misschien ok wal vallen was). En dat de ien wal een aangepaste raand kreg, maar de aander niet. En waorum die wal en wij niet? En dat er non straks overal plankies veur de opritten ligt, um der toch maar zunder al te veul geweld tegen op te kunnen kommen. En dat liekt toch niks? En wat of de gemiente wal niet denkt. En daor moet wij dan bezwaorschriften tegen opstellen en met handtiekeningsliesten langs de deuren.
Wat is het toch heerlijk um in Slien te wonen.
Geert is er nog aal niet weer. Hij löp vast even deur de Broekveldstraot.
Groeten, Henderkien