Veuroet of achteroet?
Wij waren nog maar goed en wal een dag of wat in’t neijaor, doe Geert en ik op’n störmachtige aovond host wat kribberij kregen met oes twiebeiden. Of’t non van’t weer kwam, Geert hef’t niet zo dik op störm, of umdaw van’t jaor zun snötwintertien hebt, ik weet’t niet, maar wij waren’t lang niet iens. Wij waren er zowat een dag franterig van, Geert en ik. En ja, waordeur kwam’t ok al weer? Oh jao, zo was’t: Geert zee under’t eten dat Slien er geweldig op veurop gaon was de leste jaoren . Ik zegge: “Hoe dat zo mien ij?” “Vanwege de Albert Heijn en zulkswat” miende Geert. Wij stegen op in de vaort des volkeren, wij hadden een wasserette, drie kappers, wij hadden een snip-snap-snaorenwinkeltien tegenover de Albert Heijn, en aal zulkswat mèer. Nee, Geert was er geweldig over te spreken. Wij kunden trots wezen op oes darp ruup e, doe e met’t lief vol eten op de bank deel streek um daor de ogen even een half uurtien dicht te doen.
Ik zegge: Wij boert aal wieder achteroet. Ja. Achteroet. En dát zeg ik.
Dat wol er bij Geert niet in. Ik zegge: “Hier hej de schötteldoek, dan zal ik je dat under’t ofwassen ies even oet de doeken doen. Dan kuj daornao nog wal even de ogen dichtdoen. Nou, dat gung met veul tegenzin deur.
Ik zegge tegen Geert: Zeker, die grote winkel midden in’t darp is barre makkelijk. Dat wil ik niet ontkennen. Maar wij hebt in Slien gien mooi darpscafé meer. Café Zwols stiet of leeg, of er hoest wildvrumden in die schik hebt in oes aole darpshart. Slieners hebt er niks meer te zuken. En ’t aandere café is ok dicht, allen de cafetaria is er nog veur een puut patat en De Deel veur aj een feestien geven wilt.
En zun snip-snap-snaoren winkeltien? Almaol goed en wal, maar de Sliener bazar dan? Daor komp aal minder volk. En as die op’n dag zien deuren slöt, dan zuj ies wat beleven. Dan kuj hen Emmen reizen aj een schroef hebben moet, of een sukerpot of kwasten of weet ik veul wat. En wat möt er van Henk en Grietje Reinders heur winkel terecht kommen as er ok nog ies een grote dreugist komp tegenover de Albert Heijn? Dan giet er weer een markant stukkien Slien verleuren. ’t Gemientehoes is al vort, het postkantoor, de melkfabrien ... En aw pech hebt giet de bieb ok nog dicht, en zo giet’t maar deur. De meul stiet te verpieteren, het esdarpenlandschap met mooie boomwallen en veul open ruumtes is jaoren leden al bedörven, de gemientewarkplaots bestiet hier niet meer, wij hebt gien gruunteboer meer en gien slager ... Denk er um ruup ik tegen Geert dat oes ok al veul ofhaald is. En dat er aal minder typisch Sliener zaken overblieft. Die Drèenste darpen gaot aal meer op mekaar lieken en dat begroot mij de tienen oet.
“Nou, wat kan mij dat verrekken” mosterde Geert. “Daor is genog veur in de plaots kommen waor ik goed met leven kan” Ik heb de ofwasbözzel in’t vat gooit en bin een zettien hen boeten lopen. Het wuur mij almaol even te veul. Misschien kwam dat ok wal umdat Jans Jansen pas oet de tied kommen is. Ok zun markante Sliener die er niet meer is, waordeur Slien weer een beetien minder Slien is.
Ach, wij hebt’t later wal weer bijproot. Achterof haar Geert al een dag of wat last van koezenzèert waor e niet met veur de draod dus te kommen. Gelukkig maar daw hier tegenwoordig een goeie tandarts hebt. Dat dan weer wal ...
As ik nog denk an tandarts Van Dongen ...
Groeten, Henderkien