Paosen.

Wat is’t een bedrievigheid in Slien hè, non’t zulk mooi weer is. Elk is in de tuun an’t krabben, of’t leven er van ofhangt. En non hielemaol vanzölf, met het Zudenveld in aantocht.
En waor ik zölf slim bliede um bin dat is dat er weer een echt Sliener gebouw veur oes Slieners beschikbaar komp. Ik bedoel natuurlijk de Deel. Ej weet wal, waor vrogger Gerriet Bussemaker in woonde, en waor later de bibliotheek en de VVV in zat. De leste jaoren hiette’t zo-in-iens het Mariushoes. Ik moet eerlijk bekennen da’k er in die tied nooit binnen west bin. Och, ik haar oet neischierigheid nog wal ies kieken wilt, maar dan mus ik allen hen binnen. Mien Geert hef an zulkse galerieën al hielmaol gien oardigheid. En als ’e die karstenboom daor in de hof zag die daor half van de bienen lag, dan haar ‘e al hielmaol eten en drunken.
Nee, non Roelof Klinkhamer en zien vriendin ’t koft hebt, wordt’t er vast weer olderwets gezellig. Als Roelof het caféholdersbloed wat metkregen hef van zien va, en daor liekt mij’t wal op, dan kuw daor met mekaar nog reusachtig veul schik hebben. Geert was al bang dat er hielmaol gien mooi terras zul wezen in Slien waor ‘e met’t zudenveld mooi dronken worden kun, maar daor is ‘e non gerust op. Café Zwols is ok al vot en niet meer veur de Slieners. Maar wij hebt’t gemientehoes weer veur oeszölf, dolkies de Deel, en wel wet kriew café Zwols ok nog wal ies weer in handen.
Ik moet je bekennen da’k een beetien tegen paosen opzie. Elk jaor weer beleeft wij, Geert en ik, een ritueel waor ik, zo lang als wij trouwt bint, maar niet an wennen kan. Mien Geert vret op goeie vrijdag, en de beide paosdagen wal tien eier daags op. ( dat bint dattig in een weekend !) Harregat !
Ik heb de boel wal ies saboteerd, deur gien eier in hoes te halen. Maar daor he’k non niks meer an. Geert jag zo hen de eierautomaat van Lukas Boes, ok al is’t midden in de nacht. Het möt toch ok niet gekker worden.
Maar heb ej wal ies bij iene op bedde legen die in twie dagen tied al meer als twintig eier op hef ? Ik bin ’s nachts tiedens de paosdagen al vaak het bedde oetvlucht. Zie huuft mij niet vertellen wat paosen met de opstanding te maken hef ! Ik weet er alles van. Gelukkig bin’k van’t jaor snipverkollen, dan ruuk ej’t niet zo.
Ik wens je toch almaol hiel plezerige paosdagen. ( ok namens Geert)

Groeten, Henderkien.

Naar archief