V.V.V.

Ik zeg vanweek tegen mien Geert: “Het mag an mij liggen, maar ’t is net of er aal meer vrumd volk deur Slien trekt. En da’s aans niet zo slim, maar wij kunt de kop niet oet de baander steken, of er komp wal ‘n ien of aander vrumdeling op oes ofstappen die weten wil waor of ‘e langs möt hen Hesselen, of waor of de brievenbus is, en of er ok een bus deur’t darp komp. Het was de leste tied zo slim dat wij het gres er smangs host niet ofkregen. Haw net weer een streek ofmeid, stun er weer zun toerist. Woj weer begunnen, kriej de gresmeier niet an. Hej hum eindelijk an de loop, staot er weer toeristen bij de heeg. Ik zeg tegen Geert: wij moet er ’s mörgens maar um zes uur oet aw gresmeien wilt, aans kriew’t niet daon.

En weej wat’t is, ej wordt er in’t lest ok niet vrundelijker op als er veur de zoveulste maol volk bij je stopt en ej kunt ‘t eigenlijk niet wachten. Ik heurde mien Geert vanweek een stel Duutsers te woord staon die hen’t zwembad wollen, op een wieze dat ik mij ofvruug of ‘e wellicht miende dat’t nog aal oorlog was. Non kwamen die Duutsers ok wal op een hiel ongelegen moment, want Geert haar zuch net het snoer van de electrische hegescheer deurmidden knipt. Maar zo kriegt de mèensen een verkeerde indruk van oes Slieners. Ik weet’t almaol wal, maar ik kan’t ok niet helpen.

Ik mus daordeur denken an de darpelingen in die musical die veur’n week of wat speuld is bij’t gemientehoes. Die waren ok niet bepaold vrundelijk en gastvrij tegenover die tentkers die Slien andeden. Aj’t ok zien hebt, dan weej wal waor ik’t over heb. En aj’t nog niet zien hebt, dan moej vanwinter TV- Drenthe in de gaten holden, want die hef er televisie-opnames van maakt die ze gaot oetzenden tussen kerst en neijaor.
Oh oh, men mus zuch jao schamen dat men een darpeling was, zo wuur dat tentkervolk behandeld. Zie wuren al bij veurbaat van vanalles en nogwat verdacht, en zie muzzen maar gauw weer opkrassen. En ik miende dat wij zanddrenthen zo gastvrij en gemoedelijk waren.
Doe ik Geert zo heurde blaffen tegen die Duutsers, vleug mij’t schaamrood naor de kaken.
Die dee al net als dat volk in die musical.

Maar non las ik vanweek een berichtien dat slim verhelderend was: ’t VVV kantoor giet weer lös! Oh, jao, dat was sleuten, dat is ok zo. Daorum was’t natuurlijk zo drok met vraogende toeristen! Ha, gelukkig maar. Kunt wij teminnen weer rustig gresmeien. En dat möt ok wal want het wost je tegen klippen op met dat regenachtige, bruierige weer.

Groeten, Henderkien.