Ofscheid dokter Trompert

Heb ej ok nog hen’t ofscheid van dokter Trompert west ? Vast wal, want volgens mij hef hiel Slien er west. Foi foi, wát’n volk als daor was bij Wielens. Zie zeden van wal zeshonderd man. Wat op zuch al een wonder was, want het is een hiel gedoe um bij Wielens te kommen non ze daor met de straoten an bint. Café Wielens lig weer an een zandweg, net als vrogger. Maar toen zat Wielens er nog niet op vanzölf.
Zie rupen er in Noord Slien eerst niet zo hard van um overal klinkers in de straot te leggen. Zun asfaltstraot red jao veul stiller dan die hobbelige klinkers. Veural aj op fiets bint. En zie moet al zoveul fietsen, die arme Noord Slieners, als zie hen de winkel wilt. En ok nog vaak tegen de wind in, richting Slien. Gelukkig hebt zie’t dán miestal veur de wind als zie met volle tassen weer hen hoes fietst. Zie voetert aorig op wetholder Geert Braom, want die hef ‘t er deurdrukt, dat er daor klinkers komt. Maar als van’t zommer alles klaor is, dan geef ik je op’n briefien dat elk het wal mooi vindt. Allen bij de winterdag, dan bint zulkse klinkerties zo gauw glad. Daor weet wij in Slien ok alles van. Maar goed, aj dan van winter een bien of een heup breekt op die stienties, en ej moet zes week met’t bien in’t gips veur’t glas liggen, dan kiek ej teminnen wal oet over een mooie, neie klinkerstraot die goed past in’t landelieke bield van Noord Slien. En misschien dat wetholder Braom dan nog wal even bij je langs komp met een puut siniappels of droeven of zo.
Dokter Trompert komp niet weer langs…..
Geert en ik waren er pas um half acht weer van dat ofscheid van dokter Trompert. ’s Nacht op bedde mus ik aal an hum denken. Waorum kwamen er zo geweldig veul mensen bij zien ofscheid ? Vast niet umdat zie zo bliede waren dat ‘e vot gung. Trompert hef zo veul mensen hölpen en steun geven in moeilijke tieden. Hie was- en is een warme persoonlijkheid. Maar wel zul hum steund hebben dacht ik , toen ‘e het zölf zo moeilijk haar ? Want elk pruut er over dat ‘e bij de vrouw vot was, maar wat hef zun man veur die tied al niet deurmaakt ? En zien vrouw ok vanzölf ? Daor hebt zien patienten hum nooit over heurd. En daor hebt wij ok niks met te maken, want wij weet er niks van. Maar ondanks dat was ‘e d’r veur oes. En dat valt hum geweldig te priezen. Hie mag non gelukkig een beetien meer an zuchzölf denken.
Ton Trompert kan non nog meer mooie foto’s maken. Misschien ok wal van Noord Slien, dat non nog zo mooi landelijk weer an een zandweg lig.
En ik heb heurd dat Trompert bij de zang komp in Slien. Dat zul jao geweldig wezen. Want dan kuw hum toch aal week nog’n maol zien !

Henderkien.

Naar archief