Zudenveldkoorts

Het zal je niet ontgaon wezen dat het volgend jaor weer Zudenveldtentoonstelling is bij oes in Slien. Er is al weer over vergaderd en op 20 september is er een veurlichting in het MFC an de Brink veur elk die daor belangstelling veur hef. Ik zeg tegen mien Geert: “Daor moew wal even hen. Maar ies heuren wat ze van plan bint aander jaor.” Ik denk: Geert wil vast ok hen, want die is altied zo gek op die Zudenveldtentoonstellings. Hie giet ze ok almaol bij langs, veural um te constateren dat ’t niveau daor toch lang niet zo hoog is dan bij oes in Slien. Nou ja, Hesseln, Zweel en Daolen komt in de buurt, maar as ’t er op an komp, kunt ze toch niet an oes tippen, mient e. En as ik hum op de kast kriegen wil, opper ik altied dat elke zudenveldplaots zuchzölf het beste vindt. “Kan wal zo wezen”, röp e dan steevast met de wiesvinger umhoog, “maar Slien is van oldsher de heufdplaots van ’t Zudenveld, en dat zal altied zo blieven. En dat ziej der ok an of!”

Maar de leste tied is e aorig an ’t inbinden. Toen de eerste geluden over het kommende Zudenveld de ronde deden, zee e: “Ach, het wordt niks. De olden hebt er gien zin meer an en de jongen bint er toch niet veur te porren. Wel kan er non nog een mooie wagen versieren? Of een boog bouwen? Wel verstiet nog de edele kuunst van het zaodplakken? De jeugd zöt je ankommen. Die doet alles op de telefoon of met A.I. of zowat hen. Nee, zo as ’t vrogger was, zo wordt ’t nooit meer”, kluug e. “Acht jaor leden hadden wij nog een paar van die echte old-Slieners in de straot wonen. Die gungen er nog veur. Dagenlang wagen versieren en straotversierings maken. Halsbrekende toeren hulen ze oet boven in de boog. Maar die olden bint er niet meer, of zie zit in de Schoel. En mien ij non warkelijk dat die jongen die nou bij oes in de straot kommen bint, zuch drok maakt over ’t Zudenveld? Ik moet ‘t nog zien of ze der wal bint rond die tied. Want de schoelvakanties begunt dan ok net.”

Körtum, mien Geert was op dat moment niet de man um het Zudenveld in Slien te promoten.

Totdat wij ofgelopen weekend straotbarbecue hadden. Die was deur een paar van die jonge gezinnen organiseerd, net as verleden jaor trouwens. Zie hadden het goed veur mekaar. Er was een springkussen veur de kinder, en er was een grote barbecue met heerlijk vleis en mooie sallades en bier en wien zoveul aj hebben wolden en gezellige muziek op de achtergrond. Op zulkse momenten is mien Geert op zien best. Hie miende dat e gewoon met die jonge kerels metdrinken kun, maar nao goed een uur vun ik al dat e meer lawaai haar dan aans. Hie haar ’t hoogste woord. En ’t gung over ’t Zudenveld. Hie stun bij een groepie kerels, en die vrugen hum het hemd van ’t lief. Want zie hadden heurd daj ok priezen winnen kunt met de straotversiering, en zie waren stellig van plan um de eerste pries te gaon halen. Maar hoe pakt wij dat an Geert, wolden zie weten. En hoe deden jullie dat vrogger dan Geert? Want dat wilt wij ok! En kunt wij oes al opgeven? En is er ok ’n thema? En Geert maar tettern!  Het glum hum oet de ogen, en die jongkerels hungen an zien lippen.

En toen zölfs ik hum al zowat niet meer verstaon kun, umdat e veul meer bier op haar dan e eigenlijk verdragen kan, besleut de vrolijke groep jongelingen hum te benumen tot ‘Zudenveldburgemister’ van de straot. Hie reerde ’t oet. Zo bliede was e.

Dat was aanderdaagsmörgens wal over. Toen mus de zunnebril der bij op en vruug e waor de asprienen lagen. Maar hie was as eerste boeten um te helpen met oprumen, veuran in de stried, zoas een goed Burgemister betaamt!

“Ach Henderkien” ruup e stralend, toen e even veur de middag weer binnen kwam, “Wij kriegt aander jaor een Zudenveldfeest zo aw nog nooit eerder had hebt! Ik mag wal oetkieken dat ‘k het niet te drok krieg, want die jongen wilt in de eerste week van januari al begunnen met de wagen en de boog, bij de kameraod van ien van die mannen in de schuur. En vort twie aovends in de week. Zie hebt mij as adviseur benuumd. Ja ja! En die wichter bint ok hielmaol enthousiast. En zie gaot almaol hen de veurlichting op 20 september. En oeze straot wordt de mooiste van allemaol! Wat ik je brom. Dat nee, ik haar ’t zölfde wal dacht. Slien zal ze allemaol wal ies even een poepie ruken laoten aander jaor!”

Het zal mij nei doen.

Groeten, Henderkien.