Er is nog hoop!
Oj dat nou wilt of niet, aj ’s aovends de televisie aanzet is er altied wal even een moment daj confronteerd wordt met Haagse politici. En daor wordt wat ofkonkelt, nou er een minderheidskabinet zit, dat de oppositie keer op keer stroep um de bek smeren möt um heur plannen er deur te kriegen. En dat möt dan met aal meer partijgies gebeuren, die allemaol vertegenwoordigd wordt deur mensen die arg van heur eigen geliek overtuugd bint, en dat veural ok, namens heur kiezers, wilt oetdragen. En politiek is een raar spellegie waor Geert en ik geregeld met stomme verbaozing naor zit te kieken. Alhoewal, miestal bin ik de ienige die nog kek, mien Geert hef ’t al lang opgeven um zuch drok te maken over de Haagse politiek. Trouwens ok de gemientelijke- en provinciale politiek kan hum niks meer schelen. “Zie doet niet aans as mekaar de vlooien ofvangen, of zie bint an handen en voeten gebunden aan allerlei wetten en ofspraken die ooit met de beste bedoelings vaststeld bint, maar waordeur alles vaak zo vast as een hoes zit. Denk allèn maar ies aan die stikstofregelties. Of an al die boeren die niet weet waor of ze an toe bint, umdat er bij elk constructief veurstel wal weer een actiegroep of politieke partij is die der op tegen is.” Geert is er hielemaol klaor met. En begun met hum al hielemaol niet over wolven.
Vrogger wol nuchter boerenverstaand nog wal ies helpen um tot een oplössing te kommen, of keek men nog wal ies wat deur de vingers. Maar daor huuj vandaag de dag al hielemaol niet meer met an te kommen. En oh wee as een politicus ies een foutie maakt. Dan springt de oppositieleden er as hyena’s op of um zun persoon op te branden en veural te dwingen um of te treden. Ok al hej in ’t verleden nog zo je best daon, dat döt er dan allemaol niet meer toe. Want ja, dat bint nou ienmaol de spelregels in de politiek. De menselijke maot is vaak ver te zuken. Ok in de Coeverse gemientepolitiek was dat recentelijk aan de orde.
Mooie spellegies bint dat. Ik kan mij veurstellen dat er aal minder mensen bint die nog zin hebt um zuch in die wereld te begeven. En ik snap ok hiel goed dat politici vaak verbitterde figuren bint. “Bekvechters, kibbelkonten, zoerproemen, nussieszukers”. Zulkse namen gef Geert an politici, vlak veurdat e de televisie grammieterig op een aander zender zet.
Wat ongetwiefeld helpt um je staonde te holden in de politieke arena, is een opgeruumde natuur, in combinatie met gevuul veur humor. Mensen die dat hebt kunt vaak ok goed relativeren, bint in staot um angels oet wonden te trekken en um verbindings te maken. Bovendien zörgt zie er vaak veur dat de stemming goed blef, waordeur politici beter gemotiveerd blieft.
Mooie veurbielden in dit verband bint kamerveurzitters, zoas Jeltje van Nieuwenhoven, Frans Weisglas, Gerdi Verbeet of oeze veurige CDK, Jetta Klijnsma. Die luten zuch de kachel niet zo gauw anmaken.
En laot wij nou in oeze gemiente ok een politicus hebben die die positieve gaven hef. Starker nog, hie is tot leukste burgemeester van het hiele land verkeuzen!!
Oes aller Renze Bergsma, de Leukste Burgemeeester van Nederland!
Oeze hoop in bange dagen!
En aj nou denkt dat Burgemeester Bergsma allèn maar leuke zaken te behappen hef, dan hej ’t wal arg mis. Gedoe met wetholders die oftreden muzzen, een lastige formatie, bedreigings die e had hef, vanwege de soap over de ofhandeling van het ofgebraande groepsappartementencomplex dat nog aal as een stinkende wond midden in het mooiste diel van Slien lig te rötten (ik kun ’t niet laoten um het toch nog even weer an te stippen), gevulige fraudezaken waor e oetspraken over doen mus, gao der maar an staon. Maar aj hum treft, dan is e altied stralend bliede en geïnteresseerd. In september stiet e vast weer vrolijk bier te tappen in de feesttent en ik zag hum kös nog op een old trekkertie rieden bij het paosvuur van Daolen, met een lach van oor tot oor. Och, as alle Nederlandse politici toch ies zo waren, wat zag de wereld er dan aans oet. En wat dachten ij van de wereldleiders? Trump, Poetin en Netanyahu een dag of wat op stage bij Renze Bergsma. Ik denk dat de wereld daor geweldig van zul opknappen. En daor is zölfs mien Geert het reurend over iens!
Groeten, Henderkien