Boerhoorn

“Volgens mij is Slien slim in trek bij mensen van boeten oes darp”, miende mien Geert lest, toen e van de AH weerkwam. “IJ ziet host meer volk van boeten Slien, dan Slieners. De hiele winkel luup vol volk, en de ienigen die ik kende waren een stel oet Hesseln, een paar Zweeler en een vrouw oet Erm.”

“Er bint ok veul mensen oet Emmen die hier de trek hen hebt” vulde ik an. “Zie komt hier hen umdaj hier vrij parkeren kunt, vanwege de top-bakker die wij hier hebt, of um lid te worden van de zang. Want bij Pur Sang zit al meer dan tien leden die oet Emmen komt, heb ik heurd. En dan al die Pieterpad-ers die hier langs komt.”

“Zie vindt het hier allemaol prachtig, maar zie hebt het ok allemaol drok met die bult ellende die daor al vanof 6 mei an oeze mooie brink lig te rötten en te stinken. En dat dat nog aal niet ies opruumd is. Misschien moew daor as Slieners maar ies tegen in opstand kommen” miende Geert, “want aans hew die rommel der over de kerstdagen nog aal liggen. En wilt wij dat met mekaar? Nee toch? ”

De striedlust straalde hum oet de ogen.

Ik zeg tegen hum; “Wat woj doen dan? Met spandoeken deur Slien lopen te schruwen?” Of met de leden van de Biljartclub de Bannerschultestraot blokkeren deur der dwars overhen te gaon liggen op luchtbedden met een slaopzak um je hen, net zo as ze dat in Den Haag op de A12 doet?”

Hie keek mij an asof ik mien verstaand verleuren was.

“Nee”, ruup e. “As de eigenaar of de Gemiente die troep niet opruumt, dan moet wij as darpelingen het heft maar in handen nimmen. De Boerhoorn möt weer rond!   Wij zuukt een zaoterdag oet en vraogt elk die daor toe in staot is um met te helpen um die bult puun op te rumen! Er bint vast wal een paar boeren met shovels, kippers, kraanties en grondbakkies die ok methelpen wilt. Ik weet vast dat zuch wal honderd man anmeldt. En dan moej ies zien waj in een dag doen kunt met mekaar. Vrogger gebeurde dat ok, as er een gemienschappelijke klus was waor het hiele darp bij betrökken was. Wegen vrijmaken van snei, of umgevallen bomen, wegen underholden, en zowat hen. Dan nam de Boermarke het initiatief en gung met de Boerhoorn rond. En elk huulp met. Dat was gewoon je burgerplicht.  Veule handen maakt licht wark! Weg met die rötzooi. En wat ze dan daornao doet met die plek, dat moet ze dan maar oetvechten met mekaar. Maar Slien is die ruïne en die hekken stief op de straot meer dan zat.  

Wat dachten ij van 13 december?” vruug e, met oeze agenda veur zuch. En ik zag an zien ogen dat e ’t serieus miende…..

Henderkien