De VRBCHLES

Eigenlijk wil mien Geert nog niet hebben dat ik er over proot, want hie hef alles nog lang niet op de rit, maar ik doet’t toch even.

Weej wat’t is? Wat mien Geert in de kop hef, dat hef e niet in…nou ja, ij weet ’t wal. En dan kan ik roepen wat ik wil, maar daor döt e dan niks meer op. In dat stadium zit e nou met zien “grootse plannen”. Er bint vast wal welken die mien Geert half staon wilt, of die hum zien plannen juust wilt ofraoden, met goeie argumenten. Ik zal je eerst ies vertellen wat er loos is. (Zeg maar niet daj ’t van mij hebt. Geert kek toch nooit op de computer naor dizze column)

Umdat e, deur die coronatoestand, niet hen biljarten kan, hef e veul meer tied veur aandere zaken. Hie argert zuch al jaoren an het dichtgruien van de Jongbloedvaort. Ik trouwens ok heur. Het aole jaagpad an de Sliener kaant lig er nog aal, maar is deur bomen overgruid. Aj geern vissen wilt in ’t knaol, dan kan dat nog op een hiel klein plekkie,  maar miestal hej overal je snoer vortdaolijk in de takken hangen. En wiederop is ’t knaol bij de zommerdag ien grote snertpan vol alg, kroos en roet.

Daorum giet e vaak al in de Hoogeveense vaort vissen. Daor hej ’t as visser mooi an de ruumte. Maar dan zöt e daor al die plezierjachten langsvaren. En die kunt niet ofslaon richting Slien. Vrogger kun dat wal. Ij vuult hum non denk al ankommen.

Non wil e een verieniging oprichten um de Jongbloedvaort weer bevaarbaar te maken en het dichtgruien van zowal de walkaant as ok in het water, ongedaon te maken. De dammen er oet en olderwetse dreibruggen er in, de haven in Slien weer oetgraven,  Het holt wat daorbij vrijkomp kan dan verkocht worden as heerdholt.  Stel je toch ies veur, mijmert e dan. Ziej de schippies al liggen in de haven? De camping is er vlak bij, veur as zie ies even douchen wilt.  Men kan er weer in vissen, er kunt zölfs mooie zwemplekken in maakt worden.

Het weer gangbaar maken van het jaagpad hebt ze in Odoornerveen ok daon langs ‘t Oranjeknaol. Waorum zult wij dat in Slien ok niet doen kunnen?  As er niks met de Jongbloedvaort gebeurt, is het straks ien vieze watergang, vol riet en aandere rommel. Misschien dat ze daorum de bomen op de wal gewoon gruien laot. Dan kuj niet zien hoe of ’t er bij lig.

Ik probeer hum veurzichtig dudelijk te maken dat zien plan met bruggen wal arg veul geld kost en dat de provincie en de gemiente en het waterschap daor vast niet an wilt. Maar dan moej hum ies heuren. “Dat bint almaol organisaties op democratische leest geschoeid” röp e dan. “As wij met mekaar wilt dat oes knaol in ere hersteld wordt, dat oeze kinder en kinds kinder er ok nog van genieten kunt, dan kuw er toch veur kiezen um dat veur mekaar te kriegen? De provincie kreg geld zat veur behold van cultuurhistorische zaken, en aans laot ze maar in Brussel ankloppen. Daor zit wal zoveul geld. En nou die zölfde provincie toch geel zaand hebben möt umdat ze dat niet oet de Huttenheugte halen mucht, under de bodem van de gedempte haven in Slien zit geel zaand genog. En ok nog een mooie laog puun van de aole melkfabriek. Kuj zó gebroeken veur de verdubbeling van de N34. Vief miljoen mag dat kosten! Mij dunkt.

En het vrijmaken van het jaagpad kuw mooi met een stel  vrijwilligers doen. As oeze onkosten dan betaald wordt oet de opbrengst van het holt, en de gemiente haalt de takken op, dan huuf heur dat niks te kosten. Ik moet allèn zien dat ’k wat volk bij mekaar krieg veur het zagen en zulkswat.  En wij moet de gemiente overtugen. Daorum wol ik wal een verieniging oprichten”.

Ik zegge:  Een verieniging? En hoe möt die dan wal gaon hieten?

Hie haar ’t almaol al goed deurdacht. Hie zeg: “De VRBCHLES. De Verieniging tot Reconstructie en Behold van Cultuurhistorische landschapselementen rondum Slien.”

Misschien haar ik toen niet zeggen moeten dat dat een naam is die lekker bekt. Want hie haar wal deur dat ik daor niks van miende.

Maar hoe langer ik over zien idee naodenk, hoe meer ik er heil in begun te zien. Ik heb hum vanmörgen anbeuden dat ik wal secretaris van zien verieniging worden wil as’t zo wied komp.  En wel mucht wij opschrieven as lid? IJ kunt je anmelden via SleenWeb. En as er ideeën bint veur een mooie, pakkende naam veur de verieniging? Want met de VRBCHLES ziej deur de bomen het bos niet meer, laot staon het knaol.

Het zal mij beneien.

Groeten,

Henderkien

Naar archief