Leeg hoes in de straot..
Bij oes in de straot stiet een hoes leeg. De leste bewoner wuur de tuun te groot. De drup die bij hum de emmer luut overlopen was zien zitmeijer die der met oetscheide. Hie kreeg al vlot een kleiner hoes toewezen deur de woningstichting en daor is e ok al hen verhoesd. Hie is nog gien vittien dagen vort en non liekt het al zun haveloos zaakien …. onkruud in de oprit, fossen gres die overal welig tiert.. En wij hebt heurd dat ’t te koop komp. Het wordt niet meer verhuurd. En dus vraogt wij oes al een hiele zet of: Wat zul er weer in kommen??
“As ze der maar niet ‘n nust met asielzukers indrukt”, tunterde Geert vandeweek. “Want dan laot ik de heeg een meter hoger wozzen!”
Daor denkt Geert en ik niet hielmaol geliek over. Oes Hillegien en Gezienus oet Beilen woont sinds een paar jaor naost mensen die van oorsprong oet Eritrea komt. Die hebt hier al asiel kregen. Gezienus mus er eerst ok niks van hebben. “Die zwarten brengt je niks” dus e te zeggen waor elk en ien bij was. Ik vun dat een walgelieke oetspraak en dat heb ‘k hum toen ok zegd. Geert en ik kregen er zowat ruzie um, want die wol zien zwaoger nog host wal bijvallen.
Maar aj heur non heurt over heur zwarte buren? Betere mensen bint er niet aj heur geleuven mugt. Zie komt altied met lekkere happies an en die Eritrese buurvrouw kan geweldig mooie kleren neien. Zie helpt Hillegie zo vaak. En het bint zulkse lieve mensen! Hie is kinderarts in ’t Academisch ziekenhoes in Grunningen en toch hef e de tuun er altied prachtig bijliggen. “Daor kan ik niet tegenan” gaf Gezienus ruiterlijk toe.
Maar Geert blef toch wat huverig veur alles wat oet aandere dielen van de wereld komp. Wat een boer niet kent…. Ik zegge: Jao man, en dan komp er straks een blanke man oet, ik nuum maar wat, Utrecht in te wonen, en dan bin ij der wal gerust op? Dat dachten ze in Kerkenveld ok. Zun hiele gewone, vriendelijke, Nederlandse man. Niks met te doen. Totdat ze zien drugslab ontdekten in ien van zien schuren. En wat dachten ij van die “gewone’ blanke mèensen in Runerwold in heur ofgelegen boerderij? Die deden toch gien vlieg kwaod, zo leek ‘t. Met heur geleufswaanzin en jaorenlang de kinder in de kelder opsluten.
“En wees nou ies eerlijk”, zee ik tegen mien Geert, “Wat heb ij nou an ervaring as het giet um wonen naost mensen die van oorsprong oet een aander diel van de wereld komt? Hoe groot is de kaans dat je dat in Slien overkomp? Ik haar even de neiging um tegen hum te zeggen: Laot je de snor staon en steek een sigaar op”, maar dat heb ‘k wieselijk maar niet zegd. Dat was dan as grappie bedoeld, maar dat wil in dizze tied nog wal ies verkeerd oetpakken.
Ik zegge: Misschien komp er wal een gezin in met een stuk of wat van die drokke, rood-haorige bözzels van jongen, met brommers en harde muziek en een bierkeet in de schuur, die je de proemen oet de tuun steelt en je aal dagen tegen de heeg staot te miegen ….Dat gef ok kleur in de straot. Of niet dan?
Groeten, Henderkien