Vakantie
Wij bint er even niet. Nou ja, wij bint er wal, maar de kommende weken niet in Slien. Hoogoet zo non en dan in gedachten. Aj ies wens hebt van je eigen hoes of zulkswat. Of van je eigen tuun. Of daj er naor verlangt um even langs de Jongbloedvaort te lopen aj waorens in een drokke stad loopt, die eigenlijk toch niet zo mooi is as elk zee dat e is. Of daj niet hen de wc kunt vanwege ’t veule stokbrood, of umdat er gien fatsoenlijke wc ís. Dat bint van die momenten daj je ofvraogd waorum oj in ’s hemelsnaam eigenlijk met vakantie gaon bint.
En toch bint wij weer ofreisd, Geert en ik. Wij wollen oes even lösmaken van alle drokte. Even een week of wat gien stoet van Bakker Schepers, gien bosschuppen doen bij A.H, gien Vrouwen van Nu, gien Pieterpadters te woord staon die’t niet weet, even een zettien niet zien hoe mooi de neie hoezen an de Broekveldstraot worden bint. Of je argeren an de dreugte, of an de iekenprocessieroepen. Even gien Toorn van Thunaer-veurbereidings. Da’s veur mien Geert zeker wal is even goed, want die kan zowat nargens aans meer over proten. Hie speult met as middelieuwse boer. “Ik heb altied al geern boer worden wilt, dit is mien kaans” ruup e verleden jaor. Hie mus er wal auditie veur doen. Daor hef e nog wal een paar nachten liefzeert van had, maar achterof vuul dat geweldig met. Ik moet hum geregeld overheuren. Zie moet nogal hiel wat zingen. Ik kan zo veur hum invallen, ik ken’t smangs host al beter dan hie. Het tekstboek is met op vakaansie. Smangs heur ik hum hardop Toornliedties zingen as e over de camping löp. In’t boetenlaand begriept ze toch niet waor e ’t over hef.
Dus, zodoende giet ’t non even nargens over. Wij bint met vakantie. En eigenlijk doew dat veural um dolkies, aw er weer bint, vast te stellen, daw hier in Slien toch wal op een hiel mooi plekkie in dizze wereld woont en dat de stoet toch eigenlijk nargens beter smaakt dan hier. Wij hadden’t minder treffen kunt.
Aj ok met vakantie gaot: Geniet er van en rust veural lekker oet. En aj thoes blieft? Denk er dan zo non en dan maar ies an dat er zat vakaansiegangers bint die ofguunstig op je bint en eigenlijk ok veul liever achter’t eigen hoes an een glassie wien zaten, umgeven deur alle luxe en comfort die men zuch maar wensen kan. Wij woont de kommende weken in een tent…
Groeten, Henderkien