Saamheurigheid

Het valt mij op dat er de leste tied weer veul meer saamheurigheid in Slien ontstiet. Aj bij oes in de straot allèn al ziet hoe elk de koppen bij mekaar stek um plannegies te maken veur de straotversiering, straks tiedens het Zudenveld, en hoe daor deur veul mensen over spreuken wordt veur de winkeldeur van AH, dan wor ik daor toch wal bliede van. Allèn daorum al is het goed um zo iens in de acht jaor het kussen ies weer op te schudden, um er veur te zörgen dat Slien en de umliggende darpen niet allèn maar “dartien in een dozien” woondarpen bint waor elk veur zuchzölf leeft, maar daw met mekaar ok een gezamenlijk belang hebt bij veul zaken. En as elk daoran zien beste krachten gef, dan kuj met mekaar veul oet stee zetten en wordt oeze darpen nog plezeriger um erin te wonen.

Zo zaten Geert en ik vandeweek op een harfstige aovond, hie achter ’n berenburgie, en ik met een rooie wien, wat te filosoferen. En dan duurt ’t miestal niet zo lang, of Geert begunt weer over de stinkende ruïne van wat ooit het mooie HCR-Zwols was. Hie zeg: “Het is toch um gek van te worden dat de hiele Sliener gemienschap wil dat die rötzooi zo gauw meugelijk opruumd wordt, maar dat er dan misbruuk maakt wordt van de wet um dat tegen te holden. Misbruuk ja. Want de gemiente en die eigenaar hadden er ok veur kiezen kunt um die troep wal veur de kerstdagen op te rumen. Het ienige positieve wat ik daor over kan bedenken, is dat het de saamheurigheid in oes darp allèn maar aanwakkert.”

Maar nao zien twiede berenburgie kreeg e opiens een helder idee. Hie zeg:

”Henderkien, heb ij wal zien dat er een zwart net van gaos over die troep trökken is? As wij daor as darpsgemienschap nou ies met een vracht dennegruun hen gaot en daor allemaol grune takken in steekt, en wij drapeert er een paar honderd meter glitterslingers overhen, kerstboompie op ’t hoogste punt met een ster in top, dan hew der een mooie kerstattractie bij in Slien.”

Ik zag ’t ok al veur mij. Zul eigenlijk best wal kunnen. In theorie vanzölf.

Maar ik zeg tegen Geert: “Dat moet wij as Slieners niet doen jong, dat is een taak veur die eigenaar. Die hef zölf zegd dat e ’t ok een mal gezicht vindt. En hie hef oes nou al meer as anderhalf jaor opzadeld met die troep. Mij dunkt, as e wil dat e ok nog maar een klein beetie credit bij de Slieners hef veur zien toekomstplannen hier, dan zul dat toch wal het minste wezen wat e doen kan.”

Maar ik vrees dat Koning Winter de ienige is die er echt wat an kan doen deur der rond de kommende feestdagen een mooie witte laog snei op te laoten vallen.

Er is gelukkig nog gien wet die dat tegenholden kan.

Groeten, Henderkien

Naar archief