PMD container
Print

Columns

Decors

26 april 2017

Verleden zundag hebt Geert en ik nog ies weer een ende lopen. Daor kow tegenwoordig host niet meer an toe. Geert is zowat vief dagen in de week in de weer met de boog of de wagen veur’t Zudenveld, en ik bin met de buurvrouwen drok met de straotversiering an. Maar de zun scheen zundags en wij bint over Diphoorn kuierd, de Waterkampenweg over, Noord-Slien deur en over de Grunnegerweg weerum hen Slien. Doe wij het olde darp inlupen, waren wij under de indruk van hoe mooi alles er daor bij lag. Knap verbouwde hoezen, als verstilde decors, versierd deur het sluimerende jonge gruun an de bomen en de zacht-roze kleuren van de blossems an de fruitbomen. Laomer huppelden deur de hof bij’t hoes van Harmans Warming … prachtig.

Dat van die decors was een oetspraak van Geert. “Het lig er mooi bij, maar het leeft niet mèer” zee e. Men woont er mooi, maar meer ok niet. En waorum vindt wij het Noord-ende zo mooi? Umdaw er mooie herinnerings an hebt. Oet de tied dat aal boerderijen nog boerderijen waren. En het winkelcentrum daor nog was: Bakker Boer, Jan kapper, Roelof slager, Henduk Weiman, Bakker Weuring, de doe-het-zelfzaak van Frits Geugies, Café Klinkhamer, Café Zwols, Schilder De Vries, Rotman (later Reinders textiel en drogisterij) en ’t gemientehoes was nog gemientehoes en men gung in Slien hen drie kerken … Almaol verleden tied.

Henk en Grietje Reinders waren de lesten die op 1 april de handdoek in de ring gooid hebt in dat diel van Slien. Een historisch moment. Wij bint trouwens wal arg beneid wat de neie eigenaren gaot doen met dat grote pand daor an de brink. Zul er nog weer een winkel inkommen? Wij denkt van niet. Alhoewal er ruumte genog in is um er almaol kleine winkelties in te maken: een bakkerijgie, een slager, een schoenmaker, een zaak waor men varf en doe-het-zelfspullegies kopen kan, een terras er naost um wat te drinken, en misschien zölfs een dependance van het Coeverder gemientehoes. En as zie er dan wat hoender bij holdt, is het boerenaspect er ok in vertegenwoordigd. Het zul kunnen ....

Zo lupen wij wat te fantaseren, terwiel wij over de Schaopstreek weerum richting hoes lupen. Eigenlijk is’t een wonder dat het Zudenveld nog bestiet, mijmerden wij. Zul dat ok kommen deur de hang naor het verleden?  Er komp geleidelijk een generatie mensen die al dat aole niet meer metmaakt hef. En hoe giet het dan met dat Zudenveldfeest?

Wij lupen Langs de Sliener bazar van Laamert en Aaf. “De lesten der Mohikanen”, mompelde Geert, terwiel e even de etalage inkeek. “ Laot wij daor maar zunig op wezen”. Ik dacht an oeze kapotte snelkoker. Wij kookt al vittien dagen water in een pannegie aw thee zetten wilt. Mörgen vort maar even hen Laamert um een neie.

Groeten, Henderkien

Naar archief